窩心的禮物!!!!!!!!!!!!!!!!!

早前收到一份好窩心既禮物呀!

就係泡泡茶親手刻咗兩個粒珠印章比我呀!

兩個印章我都好鐘意呀! 尤其是有個皇冠果一個,

我特別喜愛呢!

我已經印咗好多粒珠透明袋喇! 係粒珠甜點真係大派用場呀!

泡泡茶真係好多謝你既心意呀!



以下就是包裝精美既粒珠印章喇!





除咗印章之外, 泡泡茶仲整咗好多美食送比我呢!

首先就係榴槤慕絲, 超級好味道呀!

每一口都好似食緊榴槤肉咁! 真係好正呀!





其次就係有香濃牛油味既磅蛋糕喇!





我同泡泡茶咁近, 真係感到好幸福呢!



好多謝你呀!

是日晚餐

好似好耐無post過是日晚餐喇!

其實我無偷懶架! 我而家一個星期都會煮二至三日飯,

不過無特別影相咋!



我今日整咗三餸一湯, 有黑椒香草焗雞翼, 豆腐蒸魚滑, 清炒菜芯苗,

同埋青紅蘿蔔粟米鮑魚邊煲豬"月展".

個黑椒香草焗雞翼係第一次整架咋!

老公今朝話要食焗既雞翼, 於是我就隨意奄咗啲雞翼去焗,

好彩焗完既成品, 佢話好好味, 放心晒!!!!!!

西貢遊

今日帶咗珠珠入西貢沖涼剪毛, 係放低珠珠扮靚之後,

我地就同粒粒係西貢周圍逛逛喇! 係逛既時候,

我地就遇上毛毛, Spicy, Bingo & BBG呀!

佢地今日一齊去白腊行山同埋食海鮮呀!

本來我地都有份去架~! 不過因為老公又唔食海膽,

粒粒珠珠又唔可出太耐街, 所以我地就無應約喇!



雖然我地無得去, 不過我地都影咗好多相呀!

這就是可愛的毛毛喇!













老公仲抱起可愛既毛毛影呀!





跟住就係超靚既Spicy & Bingo喇!





我都同佢地影番相先.





大合照嚟喇! 不過個個都唔合作架!

粒珠大澳一日遊

今日終於同咗粒粒珠珠入大澳喇! 我地想入去好耐架喇!

係早幾個星期, 一係就落雨, 一係我就要出order, 次次都去唔到,

今朝本來都去唔到架! 因為老公較錯鬧鐘, 好彩粒珠聽話, 好快就食完早餐,

去埋洗手間, 我地用咗半個鐘就出到門口喇!



今次入大澳除咗同粒珠入去行吓之外, 我地主要係要買花膠既,

因為我年年都會入去買架! 我係去一間叫"大澳全記"買既,

佢唔係市中心架, 要行得比較入既, 不過佢既東東真係好靚,

老闆娘又好人, 又唔會"厄程", 這間海味店係朋友介紹我去既,

我入去買過之後, 而家都好小係市區買喇!



今日我地係屯門搭船入大澳架! 珠珠第一次搭船, 好緊張呀!

不過這艘船既船程都耐呀! 我地搭咗個幾鐘先入到去.





















這是我的戰利品, 勁重呀!





大澳全記

大澳永安街87-89號

榛子小蛋糕

我地係上個星期六同毛毛豬, Spicy Bingo及一些新朋友仔去咗西貢海灣食坊飲茶呀!

我地一行十人十狗, 十分開心呀!

那裡環境好好, 對住個無敵大海景, 食物質數可以,

最重要係可以同埋自己既小狗一齊飲茶, 唔駛偷運, 唔駛鬼鬼鼠鼠,

簡直係人生一大樂事呀!

不過今次無相睇呀! 因為我太多東東拎, 唔記得拎相機呀!

真失敗, 激死人喇@.@



今次個聚會, 我整咗心型榛子小蛋糕比大家食,

希望個個都鐘意喇!









如果大家懶, 又唔想自己動手整, 可以向粒珠甜點訂購架!

三八婦女節@扎山道

三八婦女節係珠珠個姐姐條條3歲生日呀!

我們一家被邀請出席條條在扎山道郊野公園舉行既生日會,

當日非常開心呀! 粒粒滿場走, 四處向友人討食, 而珠珠就只有呆呆的

因為佢好想瞓覺, 所以不在狀態呀!



我當日就整咗Lup Chu Dessert既Blueberry Muffin送比大家食,

個個都好鐘意呀! 好開心呢!









以下就是珠珠的姐姐, 藤條條喇! 係咪好靚女呢!

個狗蛋糕係藤爸爸做架! 又健康, 又好味呀!







以下就係我既寶貝粒粒同珠珠喇!

全部相都係藤爸爸影呀! 真係麻煩晒喇!











































在此再和條條說聲生日快樂, 日日都開開心心, 健健康康.

超級美味的提拉米穌(@V@)

早幾日我落去找泡泡茶既時候, 她又為我送上超級美味既Tiramisu呀!

這個Tiramisu比起上次她給我的更加美味,

有濃濃的酒味和咖啡味, 芝士漿又軟滑, 

令我而家都好想再食呀! 最重要連咀雕王都話好味,



另外係早前泡泡茶都整咗Raspberry Tart比我食架!

不過因為太心急食喇! 唔記得咗影相, 個Tart又係非常美味架!

酸酸的紅桑子, 配上香甜的吉士忌廉. 正呀!



泡泡茶真係好多謝你呀!

Blueberry Pound Cake

又係Blueberry Pound Cake 呀!

依排除咗整戚風之外, 就好鐘意整這款蛋糕喇!

尤其是用來做伴手禮, 真係又精美, 又好吃!

我明天就會送給朋友仔喇! 我諗佢地一定會歡喜啫!

栗子戚風蛋糕

因為好朋友要用栗子茸, 而她一個人又用唔晒一罐, 於是我就和她share喇!

我地開咗栗子茸後, 就要係一個月內用晒佢, 如果唔係就要送比大口仔喇!



基於我一定唔會晒野, 所以就立即動手整個栗子戚風喇!

仲有大約300g栗子茸, 真係要努力整栗子味既食食呀!





栗子戚風蛋糕



17cm 戚風模



材料:

1. 栗子茸(Hero) 100g

2. 牛奶 1.5大匙

3. 蛋黃(L) 3個

4. 砂糖 70g

5. 沙拉油 50ml

6. 水 40ml

7. 低筋麵粉 80g

8. 蛋白(L) 4個





準備:

1. 低筋麵粉過篩兩次備用.

2. 預熱焗爐180度.



做法:

1. 鋼盆放入栗子茸用膠括弄至軟身, 然後加入牛奶混拌成滑潤的狀態.

2. 依序加入蛋黃, 1/3砂糖, 沙拉油, 水, 用打蛋器拌勻.

3. 加入低筋麵粉, 繼續攪拌至光滑柔潤的樣子. 備用

4. 在別的鋼盆放入蛋白, 用電動打蛋器打至發泡, 加入一半沙糖, 繼續攪拌,

再加入剩餘的沙糖,繼續打發, 打至可以拉出尖角後, 蛋白霜完成.

5. 取1/3蛋白霜加入(3)中, 用打蛋器攪拌均勻, 再倒入剩餘的蛋白霜, 輕手地攪拌均勻.

6. 將(5)從稍高一點的位置一口氣倒進模中,

7. 用兩隻手提起模型然後放下輕敲, 讓裡面的空氣釋出, 用180度焗35分鐘即成,

8. 一出爐後, 立即倒扣. 冷卻後, 脫模, 即可.





蛋糕既內心世界, 好軟綿綿呀!!!!!!!!!!

朱古力梳乎厘@V@

係早幾日食完晚飯後, 就好想做甜品吃, 見未整過梳乎厘, 於是就試試看.!

我本身食梳乎厘係唔鐘意食原味既, 我覺得原味怪怪的,

但屋企所有書都無其他味道既食譜, 有既都非常複雜, 睇見都唔想整喇!

於是就上網左搵搵右搵搵, 好彩最後都搵咗一個做法非常簡單又好味既食譜

老公都好鐘意呀!



食譜-->Chocolate Souffles



我用咗66%朱古力, 所以我加咗10g糖去打蛋白.

咖啡戚風蛋糕

因為朋友的喜愛, 我用上一種我好小用的食材-咖啡來做蛋糕.

我平時好小好小飲咖啡架! 因為我飲咗咖啡會瞓唔到覺,

而且我亦都唔係太喜歡咖啡的味道, 最重要係我飲咗後我個心會跳的好快,

so我真係好小飲架!



今次整既咖啡戚風, 個買樣都幾滿意. 唔知個味道好不好呢!

不過我整既時間, 已經聞到好香好香既咖啡味, 希望她會歡喜喇!













咖啡戚風蛋糕



17cm 戚風模

材料:

1. 蛋黃(L) 3個

2. 砂糖 80g

3. 沙拉油 40ml

4. 即溶咖啡 2 ½大匙

5. 熱水 45ml

6. 咖啡酒 (Kahlua) 1大匙 (我改用了RUM酒)

7. 低筋麵粉 80g

8. 蛋白(L) 4個



準備:

1. 低筋麵粉過篩,備用.

2. 即溶咖啡用熱水沖泡後, 放置一旁冷卻

3. 預熱焗爐180度..



做法:

1. 鋼盆中放入蛋黃, 依序加入1/3量砂糖, 沙拉油,用熱水沖泡開已放涼的即溶咖啡, 咖啡酒用打蛋器拌勻.

2. 將已篩過的低筋麵粉倒入(1)中, 用打蛋器攪拌至光滑柔潤. 備用

3. 在別的鋼盆放入蛋白, 用電動打蛋器打至發泡, 加入一半沙糖, 繼續攪拌, 再加入剩餘的沙糖,繼續打發, 打至可以拉出尖角後, 蛋白霜完成.

4. 取1/3蛋白霜加入(2)中, 用打蛋器攪拌均勻, 再倒入剩餘的蛋白霜, 輕手地攪拌均勻.

5. 將(4)從稍高一點的位置一口氣倒進模中,

6. 用兩隻手提起模型然後放下輕敲, 讓裡面的空氣釋出, 用180度焗30分鐘即成,

7. 一出爐後, 立即倒扣. 冷卻後, 脫模, 即可.

焗藍莓芝士蛋糕

這個蛋糕是尋日整架! 係整來今晚去朋友屋企食既.

我朋友特別request要濃濃芝士味, 又要有口感, 又要實實的,

我諗一係就New York Cheese Cake, 唔係就Baking Blueberry Cheese Cake,

最後佢就選擇咗Baking Blueberry Cheese Cake,

這個蛋糕我自己都超級鐘意呀! 佢就係阿Ter上次整比我果個喇! 諗起都好開心呀.............



整完這個蛋糕都未夠呀! 我朋友的女朋友鐘意食咖啡味既軟綿綿蛋糕,

所以今日都會整多一個咖啡戚風帶去呀!

白吐司--17小時冷藏中種法

今日終於挑戰咗仙姐-天然麵包香既白吐司喇!

今次個製成品尚算滿意, 我冇吐司模, 於是就用咗磅蛋糕模做,

這個吐司既口感真係好鬆軟, 而且個味道好好,

我會把個吐司再放多一兩天, 睇睇個口感如何.



另外我覺得製作這個吐司既麵糰真係比較濕,

我做到最後做形都好痴手呀! 我諗我下次會減些水份.