Day 3
(24/Jun) 大阪 ->京都 (住Hilton Osaka)
今朝7點就起身喇! 快快在酒店食完早餐, 就立即出發去京都喇!
我地由梅田站去京都太約要30分鐘車程,
去到京都再搭206號巴士去五條坂,
太約10分鐘就到喇! 然後就再行上去清水寺附近既岡本和服店.
我地今日咁早起身既原因, 就係因為約咗9:30租和服呀!
一去到和服店, 我地就立即向店原示意我地已經預約架喇!
跟住店員記底我地既姓名後, 就立即帶我地去揀和服喇!
女子和服有600款選擇, 真係睇到花多眼亂呀!
好彩, 我有自己既心水顏色, 主供某幾隻色就快好多喇^^
揀完和服仲要揀腰帶, 內衣, 腰飾, 而且每一樣衣物都要同和服相襯,
真係揀咗好耐 先完成這個程序呀! 揀完整套和服後,
店員帶我到更衣室, 親自替我換上和服,
更換和服既過程真係好有STEP架! 佢一層一層咁幫我穿上,
而腰間亦用好多布和布帶扎到好實好實, 想吸大啖d氣都唔得呀!
我足足換咗個幾鐘先換晒整套和服,換完和服後,
跟住就去整頭, 配頭飾, 再揀埋手袋和木屐, 就完成晒喇!
當我完成晒既時候, 老公原來一早已經換好晒喇!
男仔真係方便好多, 不過原來佢都要扎腰架! WAKAKAKA
我地換晒和服後, 店員就同我地係店舖內既庭園影咗張合照,
跟住我地就向清水寺進發喇!清水寺已列入世界文化遺產,
是京都最有人氣既名勝,可能時間尚早,
我地行去既時候都唔係好多人,我地沿住清水寺順路行,
經過我地係仁王門, 清水舞台, 地主神社等景點, 每個景點都各有特色, 而且環境亦十分優美,
我地影完相,再順路行咗一陣, 我地就去到”六花亭”喇.
六花亭是清水寺內唯一茶寮, 既然經過梗係要試試喇!
我地叫咗綠茶綿綿冰, 綠茶糯米丸和煎茶,每一樣都好有特色, 好好味,
尤其個綿綿冰十分好味呀! 休息完畢後,我地就出離開喇!
去清水去除咗遊寺廟, 睇歷史建築外,
就係去清水寺附近既二年坂和三年坂喇!
果到有好多特色店舖和食店,
我同老公著住和服來行, 真係好有feel呀!
我地差不多每間店舖都睇吓, 一睇啱就買, 不知幾開心呀!
我地行累就入咗一間 有和菓子和甜品賣既食店,
我地兩個都揀咗綠茶芭菲杯, 這個芭菲杯真係好味到非筆墨可以形容,
日本既芭菲杯真係大部分都好好好好味架!
不過呢杯就特別正, 而且仲好飽呀! 嘆完甜品後,
我地又繼續行行行, 買買買, 影影影喇! 行到差不多時間,
我地就返岡本換衫喇! 其實佢係比我地著到晚上七點半架!
不過我地唔想著完過衹園, 又再上返清水寺換衫, 所以就決定早d換喇!
其實我地都著咗4個鐘架喇!真係又靚又抵玩呀!
換咗衫之後, 我地就行返出五條坂搭巴士去衹園喇!
由清水寺去衹園五分鐘都唔駛, 我地一陣就到喇!
去到祇園, 我覺得無乜特別, 都係一條街兩邊有好多特色店舖和食店,
我覺得同清水寺既二年坂和三年坂好似, 所以我地覺得無乜好行,
最後我地行咗幾間店舖, 買咗小小野就走喇!
我地出去搭巴士返京都站喇! 去到京都站, 我地就立即上伊世丹醫肚喇!
本來想去食甜點架喇! 不過頭先果杯芭菲杯真係好犀害,
竟然令我同老公都想食咸唔食甜住, 我地最後去咗食拉麵,味道正常,無特別,
食完就搭JR返大阪喇! 返到大阪立即返酒店休息一陣, 因為今日都好累呀!
我地抖咗個幾鐘又出發喇! 我地去咗道頓屈搵食,
今次係道頓屈商店街, 左睇右睇,最終揀咗間大阪名物來吃,
就係食章魚燒, 大阪燒既食店喇! 我地叫咗章魚燒, 雜錦大阪燒和 豚肉炒麵
章魚燒好好味, 同香港食既味道好唔同, 日本既無咁膩,
而且外脆內軟, 唔會食到成口粉既感覺,
雜錦大阪燒好味過香港既和民, 佢有好多材料同埋好多菜, 食每一口都好豐富, 超讚!
最後豚肉炒麵都好好味, 不過就無乜特別喇!
食完晚飯, 我地又行咗一陣, 就返酒店喇!
3 comments:
著和服行街街好有特色！多謝分享~
隻忍者狗好搞笑, 仲要有劍~~哈哈!! 可以著到和服真係好, 其實著住佢舒服嗎?? 係咪好熱架??
隻狗真係好爆,有無買番套比粒珠.你個和服好靚呀個幾鐘真係好認真呀.
Post a Comment